新世界發展（017）噚日舉行業績記者會，由啱啱參加完富豪訪京團嘅主席鄭家純（純官）親自主持。不過噚日見純官講嘢嘅時候，好似同平時唔多一樣，再望真啲，先發現佢左邊隻眼嘅眼皮同個嘴有時會向下歪，咁啱藝人官恩娜早前證實面癱，登時令人好擔心純官喎。

「眼有神經線問題　冇事嘅」

純官就派定心丸，佢解釋話，「隻眼有啲神經線問題，耐唔中會咁，冇事嘅。」佢話，唔會覺得痛，只係會「戚戚吓」咁。睇純官噚日行得走得，記者會完咗仲企定定同記者傾咗十幾分鐘偈，眼戚戚對佢應該真係冇乜影響。
之但係，究竟純官呢個眼戚戚係乜嘢名堂呢？華華將純官嘅症狀拎去問眼科醫生林順潮，林醫生指，一個人有隻眼嘅眼皮經常戚吓戚吓，可能係患上眼皮肌肉痙攣，簡言之，係「眼皮跳嘅加強版」，呢個症唔常見，亦唔罕見，50歲以上嘅男女都有可能患上，主要係腦部第7條腦神經過份活躍，而導致眼皮戚吓戚吓嘅情況，好多時都搵唔到真正嘅致病原因，未必跟壓力有關。
眼皮跳其實屬於神經眼科疾病，如果長期跳，應先去睇眼科，屬眼科問題嘅話，可以每隔3、4個月打botox（肉毒桿菌），麻痹眼皮肌肉令佢唔跳；若然並非眼科問題，就要搵腦科醫生睇睇。

林順潮：神經活躍得滯

藝人官恩娜早前證實患上貝爾氏麻痹症，導致右邊面出現面癱症狀，林順潮指，眼皮肌肉痙攣與面癱嘅原因剛好相反，前者係神經活躍得滯，後者係神經冇反應。
近日有傳恒地（012）主席李兆基因為要上京見習總，所以推遲去瑞士打羊胎素，唔知純官係咪都因為呢個原因，搞到冇時間去打botox呢？

李華華
mailto:[email protected]