英國殿堂組合滾石樂隊（TheRollingStones）周四飛抵古巴夏灣拿，預備昨晚舉行嘅免費戶外音樂騷。其實古巴政府喺60至80年代嚴禁搖滾音樂，所以呢次係滾石自當地政府解禁以嚟嘅首個搖滾騷。

不過滾石嘅演唱會就遇上少少阻礙，據外國傳媒報道，因為滾石開騷當日係耶穌受難日，教宗方濟各曾去信畀滾石，希望佢哋避免喺呢個神性日子舉行演唱，甚至提議演出可以喺凌晨時份先開始。

消息話滾石睇到封信後感到難以置信，個騷預計吸引到50萬歌迷捧場，佢哋為咗唔令到歌迷失望，就禮貌咁回覆教宗，佢哋指世界各地都有音樂活動喺耶穌受難日舉行，而最終演唱會都如期舉行。