甘草綠葉，無綫不嬲唔重視，但可能見王維基挖走咁多人，所以都急急整番五個傑出演員獎，希望挽回軍心。得獎者分別為錢嘉樂、許紹雄、陳錦鴻、李成昌同鄭裕玲。

嘉樂話收到志偉電話，嗌佢來領獎，佢都唔信。志偉笑佢今年又結婚2又就快做老竇，仲攞埋金馬獎，笑嘉樂都唔旨在呢個獎喎。
另一得獎者係Benz雄許紹雄，Benz笑言﹕「原來男人都有驚奇(經期)
，估唔到有額外獎。」隨即連聲多謝TVB，之後就爆咗句﹕「多謝完喇，都唔知講咩。」志偉即話﹕「點解個個上嚟都好似唔知講乜嘅﹗」

之後陳錦鴻同李成昌都分別多謝珍姐曾勵珍。李成昌更妙，佢話﹕「公司叫我嚟頒獎，老婆問我頒俾邊個，我打番嚟問，今日再問，都係問唔到，多謝珍姐。」至於最後一位得獎者嘟嘟姐就笑言﹕「估唔到今日又食又拎。」