廉署最新一輯《廉政行動》電視劇下月5日起，一連五個星期六晚上7時半喺翡翠台播出，廉署搞搞新意思，首次同港台合作拍攝，而唔係同舊拍檔無綫合作。而今輯除咗喺翡翠台播出之外，仲會在有線同now收費電視播，打破無綫壟斷局面。唔單只咁，呢套劇今年稍後仲會在內地中央台全國播映，反貪劇成功北上，可能係近年頻頻訪京、同內地官員打好交道嘅廉政專員湯顯明政績。
講番呢輯劇集，今次五集取材嘅真實個案不乏轟動一時嘅大caes，包括港大醫學院前院長林兆鑫公職人員失當案、麥當勞餐廳董事總經理劉士盛收賄案、自盲眼睛嘅跨境保險詐騙案等。
負責執導嘅導演就有林超賢、葉偉民、章國明等，至於觀眾關心嘅參與演員就有張智霖、邵美琪、陳啟泰、曾江、泰迪羅賓、陳鍵鋒、李綺虹、吳雨霏、鍾景輝及蔣怡等。今次劇集主題曲《火光》由張學友主唱，似乎最吸引。