打風期間咁危險，好多司機仍然搵命搏載客，為賺多啲起價；但八號風球過後，早上市面已經平靜落嚟，竟然有紅van司機繼續瘋狂加價，北區出旺角位位$200，俾街坊鬧爆：「黐x線！」

做文員嘅讀者鄭生住粉嶺，今朝乜車都冇，滯留到10點幾，惟有行去上水石湖墟，但去到新華街小巴站至發覺，大部份司機都仲未返到：「成街好多van仔，但得3架有司機，1架係去聯和墟（粉嶺），2架出旺角。」排第一架旺角紅van仲好多人圍喺車頭，鄭生一睇原來大銀幕攝咗張紙，寫住「200直通嘉頓、旺角」。有街坊唔相信自己對眼，上車問真啲個司機，點知真係位位$200，當堂嗌一聲「黐x線」。

鄭生話雖然成街好多人徬徨咁搵車，但呢架紅van就完全無人上：「個站平時都係出嘉頓$16一程，個個聽到$200就四散，有啲就影相。」鄭生之後又試吓排大埔車條隊，稔住轉東鐵，不過等咗半個鐘都冇車，巴士重開又排勁長龍、搞咗成個鐘，最終都係放棄唔返工喇。

鄭生話以前打風都未試過俾司機坐地起價：「只要有火車或者巴士，就唔會有呢類情況。」佢形容好離譜，係趁火打劫：「如果仲係十號風球搵命搏，200蚊都算，但而家純粹因為冇車，即係等於炒，乜都為錢連坐車都炒，取之無道、冇得救！」不過鄭生最後不忘讚自己老闆，「好彩佢有人性，話無車就唔使返喇」。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568