當年今日
關於我們

隔牆有耳:
卿姐醉鴿迎戰CY杯葛 - 李八方

蘋果日報 2015/02/10 00:00


政府消息不斷話喎,梁班子會缺席民主黨喺年廿七舉行嘅二十周年黨慶兼籌款晚宴,因為白鴿黨叫梁振英下台、又話要就政改辭職公投,官員唔應該出席支持囉。傳聞傳足幾日,特首梁振英都冇正面回應,特首辦至今只係稱,政府官員會因應工作情況同日程,出席唔同場合,唔會評論個別邀請。
田少call黨友撐場
面對梁振英嘅杯葛傳聞,身為白鴿黨廿周年黨慶兼籌款委員會主席嘅李華明都嬲嬲豬,佢話如果傳聞屬實,等同「兜頭淋冷水」,係向白鴿黨「開戰」。肥仔明透露,過去十九年嘅黨慶活動,都有政府官員出席,如果今年「唔畀面」無影,雙方關係肯定進一步陷入低潮。
雖則梁振英疑似小器地落封殺令,但白鴿黨卻未驚過。肥仔明透露,黨主席劉慧卿上一次黨慶炮製嘅「卿姐醉雞」,不知幾咁受歡迎,今次卿姐會encore,但會由雞變成鴿,希望各界到時多多幫襯,買番幾樽「卿姐醉鴿」支持,佢仲話同白鴿黨同病相憐、被梁振英杯葛出席黨慶嘅自由黨,榮譽主席田少表明會call多啲黨友嚟撐場。