小小超李澤楷06年8月入股《信報》，事隔兩年幾，近日終於全面入主。《信報》網站噚日刊載董事會主席陳慶祥發出嘅聲明，指今年1月起由袁天凡接任社長，創辦人之一、林太駱友梅則退休並辭去社長及董事會聯席主席職務，但保留創辦人辦公室，繼續向董事會提供專業意見。

唔算外行人

袁天凡被視為小小超「太傅」，今次師傅出馬，外界好多揣測，有人估《信報》可能搞上市，因為袁天凡財技一流。熟識袁天凡人士同八方講，袁天凡曾搞過出版業務，做過百樂門印刷主席，出版過多本雜誌，唔可以話係傳媒界外行人。
有消息指小小超想搵經濟學家做社長，人選之一包括港大王于漸，袁天凡係芝加哥大學高材生，現為校董會成員，又曾喺中大任教，都算係經濟專家。《信報》改朝換代，台柱之一曹仁超噚日喺專欄《投資者日記》稱，因年紀漸大，負荷唔到日做12小時工作量，唔知能否維持一貫分析能力，故決定減產，今個月起日記變周記，逢周一出街，每星期同fans神交一次，仍任《信報》董事。