噚日三個大美人，59歲林青霞、54歲鍾楚紅同52歲關之琳，先後就現身喺中環置地廣場，三位大美人出現，即時星光熠熠，而佢哋嘅衣着各具特色，睇到貴婦青霞、型女紅姑及花俏關之琳，各有自己風格。

下個月3號就「登陸」嘅青霞，無時無刻都貴氣迫人，佢同朋友一齊到置地，青霞身穿高貴嘅黑色連身裙，加多條啡色披肩保暖，手上就有個啡色Herme`sBirkin手袋，呢個闊太look真係好襯佢，3點半青霞慢步進入置地文華，未知是否前往嘆hightea，大約3粒鐘之後，青霞應該發現有記者喺門外偷拍，所以離開嗰時，好醒目咁戴上黑超避鏡頭，一出門就即刻上車速閃。

至於紅姑雖然已經54歲，但仍然打扮有型，噚日5點幾，紅姑單拖以全黑look喺置地買嘢。

另外，52歲嘅關之琳亦喺差唔多時間出現，不過就同紅姑就緣慳一面，關之琳身穿灰色長外套，下身就着住花俏圖案嘅及膝短褲，左手夾着個clutchbag，仲邊行邊講電話。