音樂人陳奐仁和MCJin有個共通點，都不是賣樣的偶像派，全靠實力上位，二人惺惺相惜，繼早前推出合唱碟《買一送一》後，他們將於下周三中秋夜在九龍灣國際展貿中心StarHall舉行一場「DoubleHappiness」演唱會。
陳奐仁和MCJin的綵排進行得如火如荼，二人日前在陳奐仁位於中環的錄音室度橋，他們並肩坐在沙發上，陳奐仁隨意拿着結他彈奏，音樂響起，MCJin的rap癮便發作，他們隨口噏，甚有節奏和默契，MCJin邊rap邊稱讚陳奐仁的音樂才華。

男生相處往往較少是非妒忌，陳奐仁和MCJin異口同聲表示合作至今未曾發生爭拗，MCJin說：「我哋零argue，最多係創作上有唔同意見，最後大家會一齊商量。」
要互數彼此缺點，兩男幾乎爆頭才想出來，陳奐仁先彈MCJin：「佢有MC病，永遠對人都有無限精力，有佢嘅地方就會不停搞氣氛，我好擔心佢會好攰。」MCJin直認自己有病：「我係真係有嚴重過度活躍症，工作時會放低自己嘅情緒，使出超人能力將歡樂帶畀人，但我唔係唔可以停落嚟，一個人嘅時候都好lonely，情緒好難成日keep住喺一個level。」

當MCJin力數陳奐仁時，他一輪嘴說：「佢係工作狂，唔識叫停，佢將自己嘅時間表排到好密，插針唔落都夾硬插落去，咁樣會疏忽咗其他人。」Men'stalk結論是活躍男遇上工作狂，難怪夾到爆燈。
採訪：比華利
攝影：陳慧安