波，全部都係波！世界盃開鑼，唔講波仲有乜好講噃？各界波牛叉充電，各自力捧心儀嗰隊Team。根據八方非正式兼絕對唔科學化嘅統計，法律、飲食同官場等界別名人圈，普遍睇好德國捧盃，醫管局行政總裁梁栢賢就獨撐阿根廷奪冠。一係入，一係唔入，唔知呢班名人波牛，最後會唔會變晒燈神？

「嗰次（1974年）西德對荷蘭，係我第一次睇世界盃直播，好精彩同刺激，成個星期瞓唔著……」律師會前會長王桂壎愈講愈興奮，許冠文上身手舞足蹈，聽佢講得出「告魯夫轉身」，就知佢球齡好深，細個試過跟表哥爬上掃管笏山頂睇「霸王波」，來自聖芳濟書院嘅佢仲同同班同學曾志偉鬥過波，至今仲記得67年入戲院睇事隔一年嘅英國對西德賽事（唔好驚訝，嗰時科技未發達），直至97年都係捧英格蘭，原因相信大家都明白，但戰果每每令英躉好傷心。今年67歲嘅阿壎笑稱人大咗就功利主義咗，而家求嘅係實力兼唔好令自己傷心，近年已改捧德國隊，貪佢有隊型又唔係打明星戰，點名湯馬士梅拿唔好睇小。

有別於阿壎，飲食界波牛、最近忙上市嘅敍福樓主席黃傑龍（Simon）由始至終對德國隊一條心。雖然球隊中最鍾意曼聯，「但講到世界盃，咁多年嚟唔使諗，德國隊，由西德開始已經係。」來自培正組過「野仔隊」同人鬥波，因為鍾意排陣兼點評而有「領隊」外號，著住德國隊波衫嘅Simon話睇紀錄片覺得碧根鮑華勁，「紥住隻手都控制清道夫位置，好型」。除咗隊型同紀律，情迷德國隊源於佢哋永不言敗，「就算早段輸波都會追返上嚟，咁先興奮，捧德國隊有個好處，多數唔會好早階段令人失望」，奧爾斯同卻奧斯都係今屆留意嘅球員。佢都預咗揀重要賽事睇直播，但相信同場冇女士，「最怕同女仔睇波，成日問咩叫越位，解釋完又唔明，唔想嘥呢啲精神……」

今屆世界盃，未踢已爆冷，意大利出局，作為意迷嘅財庫局副局長陳浩濂（Joseph）都話估佢唔到。佢第一場睇嘅世界盃係86年法國大戰巴西，「我同老竇對住個10幾吋嘅電視，兩點幾睇埋12碼，睇到5點幾天光」；鍾意巴治奧，熱捧意大利，喺華仁讀書時都係足球發燒友嘅佢話94年巴治奧射失12碼一刻，至今記憶猶新，「我同啲表兄弟姐妹一齊睇，捧巴西嗰啲跳跳紥，我同表哥捧意大利就冇晒癮。」98年仲買埋意大利波衫，女士可能係貪巴治奧靚仔，「我係鍾意佢好波啫，自己入到波之餘又幫到隊友鋪橋搭路」。冇咗頭號「愛人」，今屆佢唯有將感情寄托喺「愛的替身」德國隊，「隊波機動性高又有紀律，組織又好，睇波睇成隊，今年會捧德國隊。」

唔通退休前夕，特別感懷身世？明年11月退休嘅醫管局CEO梁栢賢(PY)今屆熱捧美斯所屬嘅阿根廷，「美洲波、南美杯好細膩、夠靚，短傳滲入，彈下彈下三角短傳好好睇；美斯都31歲嘞，預料踢埋呢屆就退休，希望阿根廷捧盃，等美斯錦上添花。」來自香港華仁嘅波牛憶述那些年，「返學前、放學後，每日要踢過波先至開心」，除咗校隊仲同同學組「私幫波」，喺修頓、維園留下唔少腳毛。而佢以前其實係捧英格蘭，「不過水準真係麻麻，令人心灰意冷」；近年捧阿根廷，可能源自一段緣：78年PY去澳洲讀書，當年阿根廷首次奪冠；86年返港冇耐嗰屆世界盃，又係阿根廷稱霸喎。至於今年，PY雖然人在香港，「輪到我囡囡外國讀完書返嚟吖嘛……」波係圓嘅，估唔到連貼波都咁玄噃。