隨住教統局前常秘羅范椒芬嘅離去，教育界似乎沉寂咗成個幾月。接替羅太嘅黃鴻超做咗教統局初哥之後，一直冇乜見佢做過啲乜，噚日終於首次喺網上撰寫局中人語，講佢上任後正喺度學習，話佢了解緊教育。
黃鴻超話，上任初期，聽到唔少教育界嘅意見，佢哋都希望教統局可以同業界溝通，所以佢未來幾個月都會見吓啲教育團體；包括所有中小學校長同地區家長教師會聯會喎！
咁黃常秘究竟做過啲乜？局中人語嘅內容只係總括番羅太做過啲乜，而黃常秘就只係幾日前到訪過一間資助中學，同佢哋嘅校長、老師同學生見面，仲發放咗好多佢訪校嘅合照㖭，可能驚冇人知啩！