日本女星藤原紀香被雜誌《FRIDAY》拍得同《半澤直樹》男星片岡愛之助恩愛拍拖，女方仲要採取主動，向男友翹手又攬腰返屋企過夜，事後兩位當事人都親自承認拍拖。今日片岡愛之助就現身大阪，為歌舞伎活動出席記者會，由於係佢公開戀情後首次亮相，所以在場有記者向片岡恭喜時，片岡即點頭講多謝，當被問到紀香及結婚問題時，佢就不願多提。

不過呢段戀情是非不絕，早在今年5月爆出紀香搭上片岡時，男方個舊愛熊切麻美已喊晒口，話同片岡仲未分手，紀香蒙上橫刀奪愛罪名，而片岡亦被懷疑一腳踏兩船。熊切日前喺網誌度話「會笑住度過今天」，大家以為佢可以堅強面對，點知噚晚播出嘅節目上，熊切邊飲酒邊向拍檔訴苦，仲喊住話：「我好辛苦啊！」繼續以輸家姿態博得觀眾同情。