聯儲局減息，花旗股市彈一日就散，道指回跌成300點，投資者冇信心完全可以理解，啱啱搞咗單貝爾斯登，又傳出美林話要告債保商，即係話美林隨時又要增加撥備，咁其他投行有冇同樣嘅問題，照道理應該有，如果美林追討債保商係序幕，即係話好快陸續有嚟。
前晚花旗股市除咗俾金融股拖低之外，亦受資源股急挫所累，金價同油價插水，商品價格梗冇運行。究竟金價同油價係見頂定係技術調整，就係市場人士最關心嘅嘢。以美元嘅走勢嚟睇，仍然對金價同油價有利，不過，靠美元弱勢支撐嘅油價同金價，去到某個階段就冇作用，大家如果有留意近日商品指數期貨（CRBIndexFuture）嘅走勢，就會發現有啲唔妥，大家可以趁呢幾日假期睇吓相關嘅圖表，遲啲同大家討論嘅時候會清晰啲。

油價大跌利好

港股昨日裂口低開近700點，埋單計數唔見咗758點，結束前日嘅反彈，恒指報收21108，同開市指數差唔多，陀螺形態算係低位靠穩，不過期指就以低位20821收市，低水287點，認真麻麻。
國內股市先跌後升，油價大幅回落，航空股生猛晒，全線上升，如果油價繼續落，航空股嘅反彈力度可以好大，放完假返嚟可以留意吓。
國航C輪7418：國航（753）昨收6元，技術走勢改善，有機會上試6.78元，破位睇7.60元，可以諗吓隻C輪7418。
隻輪昨收17.3仙，有效槓桿率2.3倍，正股升上6.78同7.60元，7418應該喺22仙同28仙樓上，正股跌穿5.35元止蝕。