兩年前失意無綫嘅蔡淇俊，離開幕前後，搖身變成生意人，仲要喺話遠唔遠，話近唔近嘅佛山開雲南米線舖。問到點解要開食肆，蔡淇俊答案好單純：「因為我鍾意食米線囉。」

14年投資咗50萬嘅蔡淇俊，喺大陸佛山開咗首間雲南米線舖，主打正宗雲南米線。「其實都算係機緣巧合，當時喺大陸識咗個雲南嘅朋友，跟咗佢去當地玩，食過覺得正喎，就決定夾錢開店。至於點解會喺佛山開，就係因為佛山喺廣東，會睇TVB劇，咁當地人都認得我，最初都要用明星效應嘅，所以都要多謝公司，試業咗一陣，就真係要睇間店嘅實力。」

香港人食米線，酸辣同麻辣有分唔同程度嘅辣，又可以豬潤、肥牛逐個餸叫，不過蔡淇俊話正宗雲南米線同港式雲南米線好唔同。「正宗嘅做法，係用好滾嘅湯，連碗都要放落焗爐焗熱，碗面頭有片薄薄嘅油，隔住溫度，然之後將啲生魚片、肉片、雞脾嘅餸菜直接淥落去，其實有啲似我哋嘅打邊爐，只不過係冇火啫。」

食店主打正宗，不過慢慢落嚟，蔡淇俊就開始遇到難題。「最初諗住正宗實冇死啦，其他地方食唔到喎，但原來人哋未必受你，你諗吓配料就咁現成嘅放落去，同你逐碟逐碟落，功夫其實多好多。咁經歷咗3年，終於開始搵到自己嘅模式，原材料好似米線同酸菜，都用番雲南嗰邊，搭啲港式自選配料，兩邊夾一啲。」

現時喺佛山有5間分店嘅蔡老闆，最初創業時都要落手落腳做收銀、執枱、沖茶，不過o依家就主力做度計開拓生意，回咗當初投資嘅50萬本之餘，收入仲幾可觀。「雖然o依家都上咗軌道，但其實開第一間舖時，已經開正當地好出名嗰條街，當時舖租3萬，心諗香港閒閒地都10幾20萬啦，3萬好抵喎，即刻租，不過原來嗰條街係好出名，不過人流少呢，做咗年幾，寧願蝕裝修，都要搬走。」