政府成日話關注本港年輕人發展，但年輕人似乎唔多buy，反而「超人」李嘉誠嘅維港投資喺超人紅顏知己周凱旋（Solina）打理下，喺年輕人培訓方面仲搞得有聲有色。
維港投資上月請咗本港約八十名師生同傳媒去以色列，考察當地創新企業嘅發展，返港之後不時有後續活動。前日Solina就約咗大約四十名考察團嘅學生喺港大敍舊，想佢哋講下去完以色列之後嘅感受，睇下出發前、後有乜心態上嘅轉變。現場反應非常踴躍，仲有學生主動走去Solina身邊sell橋，明顯比起出發前大膽咗好多！
聽完班學生分享後，Solina就畀咗個驚喜大家，預告呢類海外交流團陸續有來，謎面係佢有份投資嘅智能頭帶「MUSE」。呢間係加拿大公司，維港投資喺加拿大有六個投資項目，華華估計，下個考察團係去楓葉國都唔定。
Solina又提到，香港其實有好多有關年輕人嘅活動，不過撒得好廣，打得唔夠深，佢就唔想隨便做。除咗交流團，嚟緊佢仲希望可以推出師友計劃，聚集更多喺香港已經搞緊創新公司嘅人。

林德信即場jam歌

講明係年輕人敍舊活動，Solina今次仲安排咗一場露天BBQ派對，請埋林子祥個仔林德信喺現場jam歌，等大家一路聽歌，一路食lunch，現場非常之有氣氛。成個活動由早上十點至下午一點，Solina留足三粒鐘。
雖然Solina早前自爆，話佢講完諗諗選特首之後，佢就俾超人哦咗兩粒鐘，但係睇佢對於培育年輕人嘅熱情，同埋執行能力，如果佢真係出選，應該爭取到唔少年輕人支持。

【推介好書】 怕口味太老

周凱旋（Solina）早前身處家中同一班學生用維港投資有份嘅軟件Zoom進行視象會議，背景係一個裝滿中英文書嘅書櫃，可見佢係一位愛書之人。華華前日再見到佢，特登問佢有冇邊本書可以同大家分享下。
Solina就話，自己最近睇緊由美國著名百老匯劇作家Neil Simon，所寫嘅自傳《Rewrites》，不過佢就話驚大家冇乜興趣，因為口味太老喎。
呢本書一九九八年出版，家陣喺亞馬遜書評有四粒半星星，主要講述呢位著名喜劇大師嘅心路歷程。
Solina覺得最有趣係，Neil Simon每晚要去劇院，觀察現場觀眾反應，再修改劇本，希望下次觀眾嘅反應更好。唔知佢從中有冇得着呢？　

李華華
mailto:[email protected]