【要飲多啲奶】黃祥興仆親跌斷鎖骨 擔心大肚老婆湊仔女辛苦
蘋果日報 2019/10/21 11:40
跌斷鎖骨黃祥興
- 黃祥興今早在社交網張貼斷鎖骨X光片（IG圖片）
- 雖然黃祥興平日有做運動，但估唔到會跌到斷骨。（IG圖片）
- 育有一子一女的黃祥興即將迎接第5個家庭成員，為照顧大肚太太黃祥興決定盡快做手術。（IG圖片）
41歲黃祥興今早在社交網張貼斷鎖骨X光片，留言：「想問大家，斷咗鎖骨，應該做手術？定係等佢慢慢康復？」從X光片中清楚看到，有一條鎖骨從中間斷開，十分嚇人，黃翠如、陳敏之、陳山聰都留言祝他早日康復。
黃祥興接受傳媒訪問表示：「鎖骨斷咗呀，噚晚返屋企時，因為停車場斜斜哋，我又急住返屋企，唔小心仆親，而家喺醫院，準備明天做手術，都有考慮過做唔做好，或者睇跌打，但自己好鍾意做運動，好鍾意舉啞鈴，覺得徹底性手術會好啲，將來確保99%骨會還原，雖然中醫都好嘅，但可能要一兩個月時間康復，郁動唔係咁方便，我要照顧小朋友，太太又大肚，要盡快搞掂自己，所以決定做手術。」
雖然黃祥興平日有做運動，但估唔到會跌到斷骨，他自嘲：「係囉，我都估唔到跌一跌咁容易斷，可能真係要飲番啲奶，小朋友飲得多，我就少飲奶，年紀又唔係之前十八廿二，真係要好好哋錫住身體，食番啲保健嘢。」問到有否嚇親家人？他說：「噚晚太太都喺度，我跌低後起番身，覺得膊頭位置有啲唔舒服，就試下自己chok chok chok，可能咁chok仲整傷自己，因為越嚟越痛，之後去醫院睇急症，醫生要我即刻入院，明天準備做手術。」
問到手術後要否停工休息？他說：「因為呢個禮拜未有工作在身，希望下星期可以好番，不過最擔心而家要麻煩太太送小朋友返學，因為佢大肚，辛苦佢啦。」