霍利時今季大躍進，馬季跑了未夠三分二已累積23Win，剛周日又爆了匹「旅英駿爵」。

正如早前提過，霍利時今季能夠大翻身，個人認為主要練者像開了竅，不若過往長期將旗下馬留前鬥後，反而不時刻意跟前得多，其實這才符合香港宜放忌追賽事模式，事實季內時廐有「勇晉神駒」、「凱旋星光」及「旅英駿爵」等以跟前戰術出冷。此外，時廐今季搏馬頗準，喜歡同日施展連環攻勢，大家亦可留神。

今期頭場「超甜橙」過往靠後追得過近字，直至前仗四班1400米配蔣嘉琦入Ｑ，把心一橫盡搶，不過敗給新近在三班同程大勝的「世界紀錄」，難得評磅員賽後一分不加，剛戰「超甜橙」竟可降到五班跑谷草一哩，可惜當晚郭能放得太急只得季軍，亞軍「威德將軍」其後已贏馬加分。今次「超甜橙」刻意小休兩個月蓄銳而臨，應至少可反先「威德將軍」。

另一匹時廐馬第五場四班1200米的「金飯碗」，自三仗前開始綁脷後兩Win，尤其前仗贏谷草1200米，在五班孭重磅輕鬆交出四班頭馬指數，既然上仗小休復出賽前試閘朝氣稍減仍有第四，今次「金飯碗」埋門試泥地1200米則以勁勢掄元，有力取得今季第三Win。