拍緊古裝劇《華政》嘅韓國男星車勝元，今年初拍攝綜藝節目《一日三餐》漁村篇時展現出型男以外嘅「車大媽」一面，外界極為受落，仲話3月播完後冇得睇好失落、好空虛。

今日就有消息傳出會開拍第二季，預計9月至10月播出，仲會用番原班人馬車勝元同劉海鎮。粉絲一聽見都興奮到跳起，想睇吓車勝元同劉海鎮會點樣繼續鬥嘴，點樣炮製三餐填飽個肚。

不過唔知係咪仍處於籌備階段要保密呢，《一日三餐》導演羅䁐錫就話乜都未有決定，邊個做唔知，幾時拍又唔知，幾時播都未知。而劉海鎮就回應指曾經同製作團隊討論過，但詳情全部未落實。