公民黨余大狀嘅老公都係醫生，所以佢都早有準備，掛住支消毒藥水喺頸度開會。余大狀話，病毒無處不在，香港又有確診個案，所以隨身帶備消毒藥水噴吓雙手，咁先至安心；佢又擔心醫護人員消毒、防疫用品不足，要求醫管局交代有冇足夠保護用品畀員工。醫管局行政總裁蘇利民拍心口話有足夠消毒用品，員工可隨便取用，又話支持員工學余大狀咁隨身帶備消毒藥水，大讚余大狀係防疫好例子，「簡直係人辦！」
沙士時董太A1全副裝備去牛下做騷，成為抗疫代表人物；咁啱余大狀洋名Audrey，民望又第一，今次大可取而代之成為09年A1抗疫icon，由佢出面叫市民洗手、洗手、洗手，冇話唔得，唔知官府會唔會考慮，定係留番畀特首夫人曾太領軍？
白鴿黨涂謹申透露，有熱心人擔心獨居長者乏人關顧，冇錢買口罩等防疫用品，一旦豬流感社區爆發就好易中招，所以呢位熱心人想捐出兩萬蚊，希望透過佢代交相關機構購買防疫物資送予獨居長者。食衞局局長周一嶽話會留意情況，政府暫時唔使籌錢抗疫；衞生署署長林秉恩則話物資夠，但人手緊張，衞生防護中心人員近日空群而出，「人人做到天光，冇乜瞓覺。」如果要打持久戰就弊。