馬浚偉、劉心悠、胡定欣、同馬國明等主演嘅無綫新劇《宮心計2深宮計》，噚晚本應無綫同騰訊同步首播，但竟然「臨陣脫腳」，無綫播咗，騰訊卻是「冇咗影」，更遲足三個鐘先至喺微博出Post道歉，稱「因故暫時延期，具體播出時間敬請關注我們後續發佈的官方消息。」引來不少網民大罵，特別係join咗騰訊會員嗰班，直斥騰訊「沒擔當」。

有得播，又點會唔播？無綫節目及製作副總經理杜之克噚晚出席劇集宣傳時，被問及騰訊突然抽起唔播一事，一臉無奈：「審批程序比預期用多咗少少時間，但實際情况要問騰訊。」又稱騰訊回覆無綫稱，會追番播出嘅時間表，趕及與香港同步播映。但點解突然抽起，杜之克表示：「暫時未清楚。」

據知，《深宮計》其實一早已拎咗批文，今次抽起一事，騰訊同無綫都好緊張，希望同國家廣電總局再溝通，方案包括再行刪剪，希望劇集能逃出生天，爭取下周復播。

《深宮計》斥資逾億人民幣拍攝，屬合拍劇。據知騰訊係大股東，無綫係小股，主力製作方面。如果《深宮計》真係過唔到國家廣電總局嗰關、上唔到架，對無綫有冇損失、或騰訊會否要求無綫「回水」？《蘋果》今日向杜之克查詢，他稱：「我要講嘅噚晚都講咗，唔好意思。」

其實如果《深宮計》喺大陸真係遭禁播，無綫要賠本，並非天方夜譚。

一般而言，部份中港合拍劇，大陸網站如騰訊、愛奇藝等係主要投資者，佔投資總額超過五成以上。但大陸政策成日變，今日話播得，但聽日國家一聲「題材敏感」要禁，咁點算？大陸網站自然有此一著，所以會喺合約加條文，指如果因為國家政策問題，令個劇上唔到，買方（即騰訊、愛奇藝等）可以要求製作方面承擔全部責任，換言之，製作方隨時要承擔所有風險。

至於無綫同騰訊今次就《深宮計》所簽嘅條文是否包括此項，外間難以猜測，但也有先例可援。以霍建華同周迅主演嘅清朝宮鬥劇《如懿傳》為例。《如懿傳》合共100集，耗資五億人民幣製作。騰訊當初以900萬一集嘅價錢，購買大陸獨家播映權，先支付三億人民幣首期，但該劇最後上架無期，騰訊已經向製作方新麗傳媒追討番三億訂金，令製作方損失慘重。

咁宮鬥劇有乜嘢問題？首先，喺「三觀層面」上出現分歧——扶貧觀、政績觀、政德觀，此謂之「新三觀」。宮鬥劇，日日鬥來鬥去，何來明大德嚴私德？也有大陸傳媒分析，宮闈劇日日爾虞我詐，散佈負能量———變相鼓吹大家唔使做嘢，只要用計謀鬥來鬥去就生存到……散佈負能量，價值觀有問題呀。

早於2013年，《人民日報》曾刊長文痛批《甄嬛傳》，指其「以惡抗惡腐蝕社會道德」——指劇中人只有學壞先可以生存到，呢啲不正確嘅價值觀，會教壞人，又形容呢種「犬儒主義」同「投機」心態，會對社會道德造成「巨大腐蝕」。2013年已經係咁，更何況依家？

再講番《深宮計》。以前無綫古裝劇喺大陸極有市場，一套劇純利兩三億係好閒。如果《深宮計》真係喺大陸上唔到，無綫就只能靠賣海外市場，但近呢幾年，港劇賣埠獲利已大不如前，賺番二三千萬已經好叻，由此可見港劇點解咁側重大陸市場。

大陸傳媒普遍認為，2017年係大陸古裝大劇「最後的狂歡」，架空歷史、仙俠玄幻，唔係習近平鼓勵嘅類型，反而正能量奮鬥正劇，先至係王道。再加上依家大陸政策成日變，所以做投資方同製作方真係好慘，好似范冰冰有份投《巴清傳》，都係一早拎咗批文，仲有陳喬恩主演兼有份做出品方嘅《獨孤皇后》，投資超過成三億人仔以上，但因為係宮鬥劇，到依家仍然播映無期。

精選娛聞，喺晒《娛果》
http://fb.com/appledailyent