網上作家向西村上春樹本《一路向西》賣斷市帶挈佢搵唔少錢，佢嘅出道作《東莞的森林》仲俾蕭定一間公司睇中，仲話用咗七位數買版權，向西話晒喺高登發迹，消息一出自然引嚟唔少高登仔關注。
《肉蒲團》編劇胡耀輝實牙實齒話用咗近七位數買版權，但向西喺高登就幽默回應：「的確近七位數字，因為五位數字跟六位數字寫多少少就是七位數字。」又搞笑話其實收咗十九萬八千九百六十四蚊（198964），抽吓中共水，怪唔之令高登仔like爆。有巴打問向西本書有冇e-book版，向西竟然話：「你上網搵啲非法上載版本先啦。」

嫌棄陸永Jeana

講到《東莞的森林》選角，高登仔一致劣評，個個都唔like農夫嘅陸永做男主角，又狂插班模冇演技又肉酸，話Jeana只係啱做書入面個假胸女，又話畀肉蒲團班底拍，肯定變成啲無聊鹹古。唔少巴打都話套戲應該畀彭浩翔或者王家衞導演，梁朝偉做男主角先有嗰種情懷，不過王家衞搭梁朝偉，會唔會拍到2046？