究竟馬壯——黎諾懿係一個點樣嘅男朋友同未來女婿呢？一時有報道話佢靠自己努力搵錢，希望令未婚妻李潔瑩嫁得風光生活幸福，也有報道話佢自爆婚事令女家不滿，又使老婆做柴可夫管接管送，加上女方屋企從商，身家逾五億，難免「入贅」之說；該報道仲話李潔瑩阿哥Ivan對馬壯頗有微詞，未來外父仲呻爆話要等到馬壯宣佈婚訊後先至知個女要嫁，而且成日約親馬壯見面，對方都遲到或者noshow云云。

其實呢，李潔瑩早於本月15日已於微博報定警打晒底先，事緣佢都知有周刊追訪佢哋一家，仲話今日呢篇報道係作故仔。李潔瑩話:「我只能說出一些我比任何人都清楚的事實，就是，黎生(黎諾懿)跟我家李生李太(李潔瑩雙親)friend過打band，黎生經濟獨立，有肩有腰，做的都是能力範圍內之事。況且我家李生李太家教甚嚴，如果黎生其身不正，早早就被教訓一頓，何會讓我嫁作人妻呢。」

最後李潔瑩再寫道:「婚姻是一生人的大事、美好的事，希望能夠得到的，都是祝福。謝謝。」