葉靜子早前單憑自己的能力，將「擁抱吉祥」西藏展覽做得非常出色，問她在事業方面是否有很大野心時，靜子說：「我唔知咁樣叫唔叫做有野心，我只係想推廣中國文化，我揀喺香港發展事業，係因為我覺得香港有佢嘅文化，喺中國亦有佢嘅重要地位，發展資訊方面亦比較快，我唔敢講到好偉大，我喺事業上的而且確有好大嘅理想，但我怕講咗又做唔到，所以學識唔講好過。

無意轉幕前發展
「我做呢個西藏展時，過程其實係好辛苦，一嚟我個樣好細個，二嚟又係女仔，好多人以為我唔係做到嘢嘅人，再加上我有個咁嘅背景，人哋會覺得你玩。
「所以到最後個展覽做得咁好，我真係好開心，我只係要求收支平衡，平平安安就可以，結果咁好，真係喜出望外。我係搞文化嘅人，能夠完成心願，感覺真係好好。
「直至𠵱家，我生活上都冇太大變化，我諗係心態問題，我生活依舊，而且我亦無意向幕前發展，所以好多事都唔使咁刻意，但女仔貪靚嘅嘢，就實有㗎啦，最好笑係好多朋友成日打嚟話，又見我喺報紙出現，有啲唔識中文嘅都買中文報紙睇㖭，好好笑。」