政治化妝師近年喺香港十分吃香，高官推銷政策要化妝，落區親民係化妝，起錨擺明係化妝，前晚所謂特首破天荒歷史性同反對黨領袖電視辯論，絕對係登峯造極政治化妝，可惜煲呔表現不濟，政治化妝反而自暴其醜，sosad。
禮賓府年花數以千萬元計聘請政治化妝師，全天候為煲呔塗脂抹粉，估唔到卻不敵一個80後化妝師。公民黨余若薇前晚出場前，除咗有老公胡醫生同黨友在場打氣，仲請咗個專業化妝師為佢化妝，呢個28歲化妝師名叫Angus，入行八年，系出名門，係天后化妝師嘅徒弟，據講由舞台經驗豐富嘅陳淑莊介紹。

余大狀皮膚好易上妝

Angus噚日同八方講，個幾星期前接呢個job，由於佢不太認識政治，只透過睇新聞見過余若薇，所以做呢次政改辯論化妝師都冇心情緊張，「同一般job咁做，最緊要啱客人心水。」佢透露余若薇對辯論妝冇特別要求，「佢話唔想太花巧同咁濃妝，睇落要精神啲。」
Angus平時多數做舞台化妝同模特兒拍照化妝，近年多咗接job北上，化電視辯論妝係第一次。佢話效果要自然，「因為電視有高清效果，化妝最好接近自然，好似面對面咁。」前日辯論前同余若薇化妝約20分鐘，「佢皮膚狀態好好，好易上妝。」
余若薇前晚個妝效果如何，睇過當日電視辯論嘅人可以自己評價。Angus化妝後返屋企睇電視，佢自評效果不俗，「可能配合到場地打嘅燈光，我覺得上鏡靚過現場睇。」至於余若薇同曾蔭權辯論表現，佢坦言自己冇留意政治，對政改更加冇認識，「真係唔知道點畀分。」

事業型裝扮恰如其份

余若薇平日開會都悉心打扮，Angus話余若薇日常化妝恰如其份，「佢係事業型女性，家個妝好適合佢。」政治化妝師身價不菲，幫政治人物化妝收費又點計？Angus不允透露詳情，只肯講收幾千蚊，「四位數字，同其他job差唔多。」

mailto:[email protected]