網絡23條被泛民力阻通過，拉布拉咗3個月，最後都係作罷收場，班建制派俾泛民玩足幾個月都係得個吉，唔㷫先奇！八方問咗唔少建制議員，邊個要孭呢隻鑊，佢哋話商經局局長蘇錦樑（Greg）要負上極大責任，建制派仲大數佢3宗罪，將Greg封為建制新一代「豬隊友」。
建制派數佢第一宗罪，就係懶懶閒冇做游說，搞到建制派幫政府硬食幾次流會，建制打晒開口牌叫政府收番條例，但Greg就回一句「絕不撤回」當回應！
第二宗罪係完全唔交代想點打呢場仗，一味叫建制撐，搞到建制派焗住要每小時集體離場唔超過15分鐘防流會，辛辛苦幫政府頂，點知阿Greg上星期宣佈條例作罷，事前連招呼都唔打個，建制條氣點順！
最後一條罪就係搞到佢哋上京開兩會行程亂晒龍，建制派以為政府打定輸數，捱到今個星期三可以收啦，點知局方又要佢哋頂到星期五，無端端要建制派罰坐多兩日，仲要成班人大、政協趕住上北京開兩會，梗係㷫啦！