陳奕迅（Eason)噚晚喺台灣金曲獎第三度奪得「最佳男歌手」，追平殷正洋紀錄，仲攞埋年度專輯最大獎，老婆徐濠縈同囡囡都有喺IG發文看轉播為佢喝采。

Eason最近喺老婆嘅鼓勵下做運動已漸見成效，噚晚見佢消瘦不少。對於第三度封王，佢喺慶功宴上難掩興奮心情，佢話﹕「幾天前，我經紀人直覺認為我可能不會得獎，我很相信他的話，就放很輕鬆，感謝台灣給我這個出道23年的人很大的鼓勵。」

提到Eason早前去俄羅斯睇世界盃開幕戰，疑遭球迷用手機偷拍，觸怒咗佢，令佢怒舉中指指向倫拍者。( 相關新聞﹕ https://bit.ly/2KcFJmU ) Eason直認有其事，佢解釋當時係因為一位外籍人士先對佢做不雅手勢、鬧佢哋，佢先會反擊，但佢都覺得唔應該咁衝動，佢話﹕「是對方先挑釁，我不明白點解對方要這樣做，當時忍不住，下次會聰明些，應該拿手機反拍他就好了，大家便明白我面對什麼。」但佢都覺得自己有點衝動﹕「我是公眾人物，應該要克制，不該發脾氣，做這麼多年，我應該要懂得這個道理。」

另外，Eason表示即將發行一張新專輯，當中包括有2首國語歌、8首廣東歌及1首英文歌，全國語專輯要到明年，而新巡演最快都要明年底。佢話：「以前我都是先訂好場館檔期再準備演唱會，沒有做這麼完美，現在希望先把前置做好，再來訂檔期。不過我也可以辦一場純唱歌的演唱會，這會比較容易。」佢笑言太耐冇唱歌唔得，喉嚨肌肉偶爾要用吓，先會唱得越來越好。

精選娛聞，喺晒《娛果》 http://fb.com/appledailyent