皇家馬德里教練摩連奴，呢排畀「徒弟仔」波亞斯搶晒風頭，貴為「寸王」都要搞吓花臣；親皇馬嘅西班牙報章《馬卡報》，噚日就出咗段報道，話摩連奴向會方要求，除去「門神」卡斯拿斯嘅隊長職務，仲屬意中場沙比阿朗素同後衞沙治奧拉莫斯其中一人，接替卡斯嘅隊長職務。
相信唔少皇馬球迷對呢個消息都好震驚，事關卡斯拿斯一直以嚟狀態都保持極高水準，就算西甲同歐聯輸畀巴塞隆拿，都冇人怪過佢；而且佢係皇馬青訓產品，連埋青年軍，由98年已經加盟球隊，大大話話踢咗13年。
摩連奴當然唔係儍，佢咁做嘅原因並唔係卡斯拿斯唔掂，而係認為當比賽遇上爭議性判決時，門將好難離開崗位，與球證或隊友溝通；而且摩連奴想傳達戰術時，門將位置距離教練區又遠，未必容易傳達訊息。上屆歐聯尾二的一仗分組賽皇馬對阿積士時，摩連奴想傳達「洗牌」訊息，要勞煩後備門將杜迪克，跑到龍門後同卡斯拿斯咬耳仔，結果因為揚得滯，搞到摩連奴俾歐洲足協罰停賽同罰款。

沙比阿朗素接替機會高

如果皇馬換隊長，又有邊個夠資格？《馬卡報》就話摩連奴心入邊有兩個選擇，就係中場沙比阿朗素同後衞沙治奧拉莫斯，不過換隊長建議仍有待皇馬管理層落實。其實睇番摩連奴之前領軍球隊，波圖隊長係中堅佐治哥斯達、車仔隊長就係泰利及國米隊長係辛尼迪，唔係後衞就係中場，都反映摩連奴偏好。
比較呢兩個人選，我求大俠就認為沙比機會大啲，因為佢喺隊中有君子之稱，溫文性格深得隊友稱讚，相反沙治奧拉莫斯就火爆見稱，做埋隊長隨時帶埋隊友打交就麻煩。當然卡斯拿斯係隊中地位仍然鞏固，摩連奴仍然保留佢喺更衣室發言權，同埋代表球員同會方傾獎金嘅權利。
不過皇馬新隊長係邊個，就似乎唔關青年軍中場沙拉比亞事，事關佢已經落實，以300萬歐元轉會費加盟基達菲，並簽約5年；而皇馬都有準備，合約條款列明，皇馬有回購19歲嘅沙拉比亞加優先權。