【網民熱話】便衣警捉亂過馬路? 警方話係宣傳教育
亂過馬路牛肉乾網民熱話
今日喺互聯網同WhatApps群組瘋傳兩張相,一張係一個着黑色T恤、牛仔褲男人在交通燈過路處前,攞住個file夾好似向一位女士抄低資料;另一張係黑衫男企後,前面有個着白T恤、牛仔褲、粉紅色波鞋女人正阻止一位阿伯過馬路。網民看圖識字,話對男女係便衣警察,喺街頭向亂過馬路巿民抄牌發「牛肉乾」,仲講到似層層話交通部6月中開始用便衣警捉亂過馬路嘅人。小記都收到朋友Send嘅相片同溫馨提示。
小記再睇吓網上有好多留言,對便衣警捉過馬路讚成同反對意見都有,「警力過剩」「咁亂過馬路又係唔啱嘅」「你未見過交警用隱形戰車去抄牌咩?」「咁好易中招」「 呀SIR係陰濕啲,但守燈號過馬路有幾難先?」「 唔罰多D邊有咁多錢幾十億幾十億咁比港鐵丫」「一早要咁做啦」「警力過剩」「 阿Sir請出力抄」
小記問過警察朋友,佢地就話一般來講,便衣警係唔會做發告票工作,就算幫手捉亂過馬路或者垃圾蟲,告票都係會由軍裝同事發出。小記再向警察公共關係科查問,佢地回覆話新界北總區交通部人員今日(21日)在區內的行人過路處提醒市民注意道路安全。消息話行動中警方只係向巿民宣傳教育,提高對道路安全意識,並沒發出「牛肉乾」。小記再提醒各位,過馬路要小心,依燈而行就萬無一失。
網民以為兩名便衣警察喺街頭向亂過馬路巿民抄牌發「牛肉乾」。(網上圖片)
消息指,警方話只係向巿民宣傳教育,提高對道路安全意識,並沒發出「牛肉乾」。(網上圖片)