ViuTV一部低成本製作劇集《二月廿九》，10集已經播完，但海報及劇照仍讓人留下深刻印象，除了唯美，還似有未完的故事。獲女主角吳海昕（Sofee）激讚是神級劇照師的李詩卉（Sharon Salad），是香港少有的女性劇照師，一個非常冷門的行業，全香港僅有約10位。

大學時期，Salad遠赴英國修讀時裝攝影，於大二的暑假經著名劇照師木星介紹下，接了許鞍華執導的電影《桃姐》幫手影劇照，並獲安排當中一個小角色，做劉德華姨甥的韓籍太太Yunnie，Salad說：「我send咗啲旅行相，同以前做義工時影過嘅老人家相，可能中咗導演鍾意嗰啲，所以大膽起用我。」Salad還記得第一日到片場，感覺有點不知所措：「好緊張，以為去到片場有人介紹我畀大家認識，但喺條街度，見到劉德華行路，我好驚拎部機出嚟會俾人叫『唔好影呀』，好彩最終有人發現我，原來乜都要自己執生。」

Salad的父母起初都反對女兒入行，朋友覺得她「玩玩吓」，怎料一做便8年，拍攝超過30部電影，包括《那夜凌晨，我坐上了旺角開往大埔的紅VAN》 、《29+1》、《拆彈專家》、《暗色天堂》等賣座或得獎電影的劇照師，她自覺非常幸運：「每個人都期望接好戲，冇人想接爛片，而家我都盡量接一啲，本身對劇照有期望嘅戲，自己會影得開心啲。」拍攝劇照有一定限制，要在既定的框架中，找出最美角度，Salad從小便喜愛美麗事物，會從顏色、光線和構圖拍攝一張作品。Salad每次都用心拍好一張相，但劇照的版權往往是電影公司擁有，宣傳照亦不是自己可以選擇，直言有時會心灰：「自己影得好又唔用，有啲場口未必好好睇，但可能有特別演員，你就淨係要嗰啲，一開始會灰心，後來知道係咁，未必每套戲都咁注重畫面靚唔靚，而係個故仔，你就會識得分。」

為電視劇拍攝海報及劇照，Salad還是第一次，想不到會有咁大迴響。她解釋：「有啲前輩叫我唔好做，話你實唔鍾意，始終以前嘅電視劇冇現在咁高質，啲嘢唔係好靚，但今次D.O.P.（Director of photography，攝影指導）研究得好仔細，畫面燈光上已經好唯美，我覺得今次劇照影得好唔係我一個人功勞，本身美術、D.O.P.、服裝加埋晒，營造一個咁靚嘅氣氛畀大家睇，三位靚仔靚女主角亦係我接嘅原因。」30出頭的Salad不忘大讚一班年輕的台前幕後好有熱誠：「以前拍電影個個都好有經驗，反而今次我係年紀最大嘅其中一個，年輕人好有熱誠，見到每個單位都好想盡力做好呢件事，感覺好唔同。」她還自爆拍攝海報時一段小趣事：「Sofee話我知，有網民讚日本個天空好靚，但其實張海報喺香港影，導演建議去機場附近嘅海邊，原本想喺草地，但有太大嚿雲，個光唔係太靚，我哋越行越遠，最後去咗海邊見到一個位好似橋，影出嚟個天靚到好似日本咁，哈哈。不過我最鍾意一張，反而係兩位主角跑步，因為要跑得靚一啲都唔容易。」

最近疫情影響全球，Salad日前走訪尖沙嘴街頭，亦希望以camera-eyes，為歷史作一個紀錄，她說：「我強項唔係記錄型嘅攝影，但有啲重要moment都會影。呢個疫情係影響全世界，香港或比其他國家冇咁冷清，仲有好多人企喺條街上，唯一可以影到嘅就係人人戴口罩，我哋身處其中，係歷史一部份，都想影低呢段時間嘅香港係點。」其中一張相，巴士廣告上的海報，令Salad印象特別深刻：「個廣告好似係1月掛上，好似由病毒一開始，世界就停頓咗。突然覺得呢個香港好冷清、好寂寞、好陌生，人與人之間嘅距離好遠好疏離，彷彿空氣中已經瀰漫着病毒。」

不少同行亦因疫情冇工開，有人轉職揸uber，Salad慶幸有積穀防饑：「電影行業好被動，有人大半年冇做嘢，但又冇得申請任何資助，未來幾年電影業都應該難捱，有啲人要搵第二份工。我較好彩，呢幾年有好多機會，上年拍咗4電1劇，原本今年都接咗部電影，但而家延遲開拍，好彩平時儲到啲錢，就算隔一段時間冇嘢做都生活得好好嘅。」

採訪：嵐山
攝影：沈健程
攝錄：葉君海
場地：The ONE L16 The AIR

-----------------------------
【武漢肺炎】專頁
全民自救 抗疫資訊盡在《蘋果》