當年今日
關於我們

【逆權運動】勇武青年受訪呼籲和理非罷工 「有人為你衝,你肯唔肯為佢唔返工?」

蘋果日報 2019/08/02 15:21

罷工和理非勇武逆權運動

「有人為你衝,你肯唔肯為佢唔返工?」這句子,配上年輕抗爭者護送市民離開催淚煙範圍的影像,成為近日流行網絡、關於8.5大罷工的文宣圖。
每次抗爭總站上前線、自製木盾擋彈的勇武青年阿橙(化名),看到這幅文宣圖,徐徐說了句:「我點都會為佢衝。」押上前途去衝,是為了自己,亦是為下一代、以至所有香港人。他認同8.5大罷工將是「和理非」最有用的一次行動,盼望他們能為香港團結一次、盡力一次。他呼籲平日不敢上前線的港人站出來:「如果你哋都仲唔出嚟,去好好利用你哋呢個showtime,我哋勇武派再點樣衝、點樣做,效果都唔會太大,香港就係咁先!」

若罷工不能使政府回應 「和理非好快都會變成勇武」

二十出頭、剛完成學業的勇武派阿橙,自言從前亦是「和理非」。只是,每每集會或遊行過後,政府卻「睬你都傻,又搵人打你」,才會令他越行越前。他不怕被捕,亦明白受傷流血在所難免;他只怕中子彈,連母親亦常勸他:「命仔只有一條。」
此路不通,但阿橙認為,8.5大罷工或有望成功對政府施壓,迫令躲於警察背後的政府面對群眾。他深知香港人「緊張自己份工,緊張啲錢」,不過他希望大家能為香港「放棄一次」,最好全港一同罷工。就算今次不成功,「咪再罷幾次,去到成功為止」。如果大罷工亦不能迫使政府回應?「咁和理非好快都會變成勇武,同我哋一齊勇武抗爭。」
年紀相若的Oush(化名)與阿橙是抗爭戰友。Oush雖亦希望大家罷工,但明白有些行業、例如救護員及消防員未必能夠參與,亦體諒各人有各人的負擔,「我哋係衝咗㗎啦,但你唔罷工,都怪唔到你啲乜,始終我哋唔明白你嘅難處係乜」。只不過,他認為罷工的關鍵,在於百花齊放,「如果得一兩個行業、一兩個區罷工,係冇用嘅。香港人,一定要好齊心」。

勇武派不願中場休息 「如果冇人保護和理非會有危險」

在眾多8.5大罷工的文宣圖中,亦有勸勇武派「中場休息」,由參與港鐵不合作運動、大罷工及七區集會的「和理非」接力。
休息之說,Oush表明不認同。他說,「和理非」的集會,卸下裝備的勇武派也會參與,「和理非做唔到勇武,但勇武做到和理非」。他亦在自己居住的社區建立連儂牆,「你做得勇武派,好落心落力係呢場運動入面,唔理係咩集會、咩目的,都會在場支持」。
不過,即使參與和平集會,Oush每次亦會在背包內放好全套裝備,皆因他不知警察何時清場,「如果冇人保護和理非,無啦啦俾人清場,佢哋都唔知,會有危險」。
拒絕「中場休息」,只因他知道,所有運動皆要有人犧牲,而他寧願犧牲的那一位,是他自己。「好唔好彩,真係一係赤柱見,一係醫院見,最唔好彩咪和合石囉。但總有一個人去做呢樣嘢,如果唔係,唔會有進步」。

和理非與勇武派就像矛和盾互補 但彼此不存矛盾

與阿橙及Oush不同,同齡的阿文(化名)已投身社會。他本身從事建造業,但6.12當日因罷工而被解僱,現時靠「炒散」為生。他這份散工,日做14小時,但只能做到明天,「因為星期六旺角有集會,我會出去」。由6.12開始,他每每走到最前,連7.21元朗恐襲當晚,他亦與戰友從上環匆匆趕到元朗保護市民,當晚他捱了狠狠的一棍。
阿文直言,看到「有人為你衝,你肯唔肯為佢唔返工」的文宣圖時,相當感動。他絕對支持「和理非」行動,亦曾參與港鐵不合作運動,並以矛和盾來比喻兩者關係,「當有人傷害我哋,和理非嘅盾就擋住;當有人傷害和理非,我哋勇武者之矛就走去追擊」。不過,他雖以矛和盾作比喻,但強調雙方不存矛盾。
縱然再勇武,阿文深知「唔會夠警察打」,所以他認為,罷工既不用流血,卻可迫使政府面對問題,「比起勇武衝更加強大」。但他亦明白,不少中年人已有家室,為口奔馳,一旦罷工被解僱,未必可再找到一份薪金不俗的工作,故他帶點悲觀說,8.5大罷工未必會有太多人參與。

結語:罷工,唔使諗

訪問尾聲,三人不約而同談起近日有「和理非」買飯券及裝備給予前線抗爭者。如果能夠選擇,到底勇武派希望「和理非」出錢資助、抑或是出力參與罷工?阿橙秒回:「罷工。」阿文亦稱:「罷工,唔使諗。」Oush則猶豫了一會,然後才尷尬表示:「最好兩樣都做,但二揀一就當然揀罷工。」
記者蘇曉欣
-----------------------------
【每周送10萬】
升級壹會員獨家尊享,立即參加10萬火急大抽獎 !
*推廣生意的競賽牌照號碼:52302-9