鍾欣潼（阿嬌）上月喺美國與有「醫界王陽明」之稱嘅台灣醫生賴弘國舉行婚禮，今晚阿嬌拖住老公甜蜜返港。其中阿嬌提到完成美國之旅，佢哋仲去咗日本同台灣。

問到佢哋係咪特登返台灣見家人，阿嬌話：「當係返一返屋企啦！」問到阿嬌慣唔慣被叫做賴太，佢笑一笑，未有回應，再問到佢俾幾多分老公，佢就話：「唔可以俾滿分，怕佢會驕傲。」但問到老公有冇90分時，阿嬌答「有」。

至於賴弘國就大方好多，被問到俾幾多分老婆？佢話：「滿分啦！」賴弘國又話，佢家人都好鍾意阿嬌，尤其係佢爸爸，仲話其實阿嬌婚前已經有經常去台灣探佢家人，問到賴家上下對阿嬌嘅印象，賴弘國話屋企人都會俾滿分。

問到阿嬌同老公有冇造人計劃，佢哋異口同聲講「要睇緣份」，阿嬌補充指：「同小朋友其實都係講緣份，（咁屋企人有冇催？）冇催呀，有壓力的話就生唔到。」

另外，提到賴弘國喺婚禮上開金口獻唱，佢話自己練習咗好耐，仲話：「因為我不是專業，但其他人都是專業的。」然後問阿嬌對老公唱功有咩評分，今次佢就話「滿分」！

精選娛聞，喺晒《娛果》
http://fb.com/appledailyent