美國政府早前發動歷來最大嘅搜捕非法移民行動，喺6個州拘捕咗大約1300名非法外地勞工，當局表示會繼續打擊非法移民。
美國有媒體稱，非法移民係當地最嚴重嘅問題。就移民問題，網上亦掀起熱烈討論，而回應絕非一面倒，反對移民政策嘅網友JayMaloney話，墨西哥故意畀至少一成人口非法流入美國，嗰啲人多數來自低下階層，佢哋佔用美國嘅醫療保健、教育福利，同埋交通運輸等設施，但對美國經濟就冇乜貢獻。
Ncarota亦表同意，佢話啲非法移民同美國人爭工做，壓低晒啲工資，令美國人嘅生活水準下降。Racote更話，非法移民品流複雜，好難分辨邊個係勤力做嘢嘅好人，邊個係罪犯，邊個係恐怖分子。

佔全國人口約半成

不過，亦有持相反意見嘅，jamesschaad稱讚啲非法移民好捱得，人工又低，美國好多老闆都要聘請佢哋做嘢，如果唔係，就好難繼續經營。mysubscription就認為，非法移民對美國經濟有益，因為佢哋有納稅，又唔會要求政府退稅，仲有，由於佢哋係「非法」入境者，所以冇權享受美國部份社會福利。
傳媒估計，美國非法移民有1100萬至2000萬人，佔全國人口3.7%至6.7%。《華爾街日報》嘅調查發現，多達48%受訪者說，非法移民不利美國經濟，但亦有39%人認為非法移民對當地經濟有益。