某周刊內有一篇小報道，說我如何「冇品」地在旺角的「頂好」眼鏡店內強奪人家的心頭好Prada眼鏡一副，施暴後還要向苦主丟下一句「有錢大晒！」。讀後的第一反應是立即在腦中快速搜畫一遍，會否曾真有其事情發生過但自己不知道或不記得，旺角我經常去，「頂好」我亦經常幫襯，但Prada確實是我不喜歡的眼鏡牌子，兼且自問買眼鏡非常奄尖，一定要戴在面上照個半天鏡，左睇右睇認為啱心水，才肯成交，所以應該唔會見到人哋揸住一副眼鏡就見獵心起，搶閘購買。

快速搜畫的結果是真的諗唔起有件咁嘅事，或者有接近會令人誤會我曾經做過一件咁嘅事，不是動氣，只是奇怪，萬二分的奇怪，為何該苦主會言之鑿鑿地、斬釘截鐵地肯定我曾經做過一件我完全沒有做過的事？娛樂圈內如趣聞般的花邊新聞已司空見慣，但真的很好奇為何會這樣有興趣去「無」中生出一個「有」來，惟有繼續三省吾身，是否有意中或無意中得罪了人。
這件事恐怕會成為我心裏心裏永遠的一個謎，無奈地當做係「奇幻潮」事件處理，再衷心講句：「多謝畀面」，自己都係寫稿佬，知道寫篇稿都要勞心勞力，又多謝編輯大哥或大姐畀面，佔據了貴刊的若干版面。