落飛黨趁地淋，第二場重鎚出擊大獲全勝！呢場四班千二米，賀廐「歡悅星」3.4倍大熱開跑，羅理雅交足功課，沿途守好位唔執輸，一手車輪鞭打足全條直路冇欺場，結果及時追過放頭馬「熱刺小馬」，苦戰至第14仗終於開齋，「熱刺小馬」未竟全功只跑第二，不過呢條啡燈Q，畀落飛黨轟到得番14倍，涉及注碼逾85萬，落飛黨扣本後約1,200萬就此袋袋平安。
「歡悅星」係羅理雅自五月初停賽復出以來首度建功，賀賢則連勝兩期，一對澳洲鄉里攜手做番齣好戲！今場跑第三係隔晚大熱門「帶寶來」，在韋達胯下慢閘，否則或有更佳名次。第四名則係新勝馬「好事必得」，雷神上次做潘頓替工，幫呢匹馬會前主席陳祖澤愛駒開齋，呢勻一早卜定雷神再騎，名次卻下降，或者同場地變化不利有關。