投資者教育中心過去兩年用「師奶殺手」歐陽震華同姜大衛拍短片廣告，教大家做個精明嘅「理財達人」。不過今次就一反傳統，同香港電台合作拍電視劇《回到未來錢》，就搵咗一班老中青「女神BB」幫手推廣正確嘅理財觀念，包括舊年世界盃期間紅到發紫的「大埔LuLu」董嘉儀、高登女神的「美棋BB」黃美棋及杜小喬等等。咦，今次似乎係針對「高登巴打」理財問題多啲咁喎。

杜小喬：儲起收入

「一代女神」邵音音亦粉墨登場，戲中飾演外婆幫個孫買樓結婚，但未有睇清條款，差啲被財務公司收樓。現實中嘅佢就謙稱：「IQ低，唔識理財」，又話自己最大嘅投資失誤係「投資錯男人」。至於新一代女神杜小喬就話自己會先儲起部份收入，真係乖乖豬。
一連八集嘅《回到未來錢》會喺聽日（禮拜三）晚上七點開始，喺翡翠台及港台電視31播放，第一集由前華裔小姐冠軍廖碧兒、「蝦頭」楊詩敏及陳奐仁打頭陣。其餘七集「女神」仲包括趙碩之、莊思敏、李蘊及楊淇等。有咁多女神BB壓陣，投資者教育中心會唔會「先使未來錢」？中心發言人就話，演員同選角都係由港台負責，仲話收費唔高喎。
投資者教育中心都唔係淨係講投資，仲教大家一啲老生常談道理，例如叫長者應該為自己打算，唔好為咗幫仔女或晚輩，而唔留番個近身錢畀自己。

李華華
mailto:[email protected]