一攞咪就唔停得口嘅曾鈺成，噚日出席《南華早報》一個以普選為題嘅論壇，西報主場，英文差啲都上唔到台。主持人係夏佳理，講者有曾鈺成同前政務司司長陳方安生，以及同英國皇室政界關係密切嘅上海灘創辦人鄧永鏘。
夏佳理一開始就問：嚟緊政改點樣向前走？仲即時拋咗個波畀曾鈺成。曾鈺成講咗唔夠幾句，身上個無線咪「窒窒吓」突然失靈。酒店員工醒水，即刻應變向曾鈺成遞上無線咪「補飛」，收音即時冇問題，份屬唐營嘅夏佳理即時好開心高呼：「Plan B！」如果呢句「Plan B」係習近平講出嚟，夏佳理可能仲開心。
點知曾鈺成一聽到「Plan B」，風騷笑到四萬咁口，意有所指話：「I always like Plan B」（我向來鍾意Plan B），全場觀眾當堂笑聲爆發，何止會心微笑咁簡單？可惜論壇之後嘅記者會，有人問到狼英點搞政改、中央使唔使出動Plan B時，曾鈺成卻收口，唔敢公然叫CY get out。
mailto:
[email protected]