劉德華、何韻詩同導演劉偉強，噚日傍晚喺尖沙嘴主持海港城聖誕燈飾嘅亮燈儀式，順便宣傳吓佢哋合作嘅新戲《游龍戲鳳》。現場除咗華仔、阿詩同劉偉強之外，當然唔少得聖誕老人同小天使，另外仲有銀樂隊同歌舞表演，小天使即場送咗啲星星神仙棒畀佢哋主持亮燈儀式，現場華仔表現得不知幾咁風騷呀！

問到今年聖誕節點樣度過？華仔話嗰段時間會喺北京拍新戲《未來警察》同會去新加坡做巡迴演唱會。好多藝人都話因為金融海嘯，搞到聖誕節少咗騷做，同埋騷錢都少咗，華仔就話：「其實對我嚟講影響唔算大，因為除咗演唱會外，我主力做慈善騷，平時商場活動同騷都唔會做，所以對我冇乜影響。」對於𠵱家內地演出唔可以咪嘴，一定要唱live，華仔就話：「我一向都唔咪嘴，不過當然都要睇現場音響設備，如果係唔好嘅，唱live反而仲有問題，仲衰。」另外，大會話過阿詩會着短裙出現，但結果佢係着長褸現身，阿詩話：「唔知點解大會會咁講，不過我會到梁漢文結婚先着短裙，大家都會好期待，不過我都係走投無路先會咁着咋。」