噚日我哋財經版報道，瑞銀前星級分析員陸東原來靜雞雞轉玩殼股，聽聞只有少數金融界人士知道陸東轉玩殼股，所以一朝早華華就收到唔少WhatsApp，八卦陸東旗下基金仲有投資邊隻殼股。華華就第一時間澄清，陸東前年因家庭理由已經出售佢創辦嘅Look's Asset Management畀另一財金界人士沈嘉奕，陸東目前只係出任資產管理投資總監啫。

推薦重磅股反跌

話雖如此，又有幾多投資者會分得咁仔細吖，見到陸東呢個大名，陸東粉絲可能都忍唔住照跟，搞到陸東任資產管理投資總監嘅基金有買嘅7隻股份，噚日升咗5隻，其中萬景（2193）、恆寶（1367）、義合（1662）呢3隻更升逾一成。咁樣證明陸東嘅大名仲係有啲影響力嘅。
不過又咁講喎，陸東向來以價值投資者自居，多年來公開向外界推薦嘅股份，多數係港交所（388）、騰訊（700）等重磅股，舊年12月初佢仲估計，港交所受惠於深港通，長遠有機會挑戰「金牛股」（1,000元）㖭，當時港交所股價大約200元，噚日呢？隻港交所都弱弱的升咗0.4%，收報188.3元，即係較陸東唱好嗰陣跌咗12元。所以呢，推大股易定推殼股易，你懂的。

李華華
mailto:[email protected]