香港人爭取民主自由嘅正義呼聲，得到咗國際嘅善意迴響。美國駐港總領事祁俊文發表講話，話想回應人民嘅訴求，最好就係實現一人一票嘅直選！

如吸血殭屍見陽光
二○○七年普選特首，二○○八年立法會全面直選，呢兩樣係香港人實踐真正港人治港、真正高度自治嘅正確訴求，美國駐港總領事回應支持，好嘢！
當然，即時就會有土共及其蒙蔽嘅人，聽見美國總領事咁講好似吸血殭屍見到太陽光咁痛苦嘶叫：香港政制係香港人嘅事、中國內政，幾時到美國佬出聲「干預」？
笑話！台灣幾時同中國統一，乜唔係中國內政咩？今次溫家寶訪問美國，又唔見佢敢大大聲話「台灣問題係中國內政」，反而叫美國表態幫手制住台獨？
民主、自由、人權無國界，中國當年都支持過東南亞共產黨推翻本國政府奪權，重提供埋軍事援助，話呢啲叫做「國際主義精神」。𠵱家，美國駐港總領事發揮國際主義精神，支持港人民主普選，姑且又睇吓民建聯點樣反應？想唔要選票，就即管拉大隊去花園道抗議「美國干涉內政」吖笨！
美國人民係香港人忠實嘅朋友。七十年代香港輕工業發展，多得美國開放市場，輸入大量香港製造嘅膠花、假髮、玩具、鐘表、牛仔褲，香港先至有經濟起飛，香港人方有今日嘅富裕。重未計美國佬資助嘅《中國學生周報》、《兒童樂園》、米奇老鼠、星球大戰，到今日嘅電影《魔戒》，同香港青少年啟蒙開智，為香港電影人吳宇森、成龍、周潤發、袁和平提供發財機會，協助我炎黃子孫，喺全球吐氣揚眉！