信和置業（083）主席黃志祥呢排頻頻陪仔女出入馬場，噚日佢阿仔黃永光隻新馬「萬利多」第一次出賽，見佢兩父子齊現身，為隻馬打氣，可惜萬利多唔多爭氣，竟然跑包尾。不過跑馬就係咁，冇話贏硬，信置走去投地，都唔係次次投到啦。
黃志祥同幾名仔女都係馬主，主要叫「乜」利多，呢個利多系好易認，阿女黃敏華有隻「連利多」，今年跑三場贏三場，相當厲害。黃永光呢隻萬利多4歲，舊年來港，操咗幾個月，噚日首度出賽，跑第五場，同場仲有華人置業（127）主席劉鑾雄女友呂麗君隻「替天行道」，跑第四。
黃永光之前養過厚利多、永利多同勝利多，贏過，但唔算出眾。但養馬對黃志祥一家，應該都係興趣為主，黃志祥今季都好少入馬場，只係呢排先頻頻現身，陪仔女支持愛駒，順便家庭樂。