8月10日，「港版國安法」的魔爪伸延至《蘋果日報》大樓，壹傳媒創辦人黎智英及多名管理層先後被反綁雙手拘捕，隨後逾200名警員封鎖報館搜查，肆意在報館拉起封鎖線，搜查新聞材料，更有同事被午膳或如廁被「禁足」，整個過程歷時9小時。

《蘋果》找來多名員工分享在黑暗9小時的經歷。負責直播的同事，事發一刻只希望以鏡頭記錄報館內情況，務求讓世界看見；印刷部同事為擔心「會唔會出唔到報紙」，一夜無眠，見證報紙順利出街而感動落淚。當被問到對《蘋果》的寄語，他們異口同聲：「撐落去！」

入職《蘋果》7年的突發組採訪主任陳先生，是昨天第一位在《蘋果》報館內直播採訪的記者。他指，當時知道黎智英、黎的兩名兒子及多名高層被捕，同事均忙於在外勤工作。在公司人手極少情況下，於早上9時許，他卻收到消息指有大量警車正駛往《蘋果》大樓，「當其時完全唔知係想嚟封報館定點」。

當陳趕往地下大堂時，已發現大批警員從大堂的旋轉梯中進入大樓，他馬上跑上1樓，拍下被網民瘋傳、警員進場的照片，「當時個畫面係好震撼，入到嚟佢哋已經係一個『勝利者』姿態，隨意打開啲門睇。」

當時警員完全沒有出示任何搜查令。那一刻，陳只有一個念頭：一定要將報館內的情況對外公佈，讓市民、世界看見《蘋果》的情況。於是平日較少上前線的陳，首嘗直播滋味，他笑言「睇返都幾多甩漏，手又震，雖然盡量冷靜」，但感到相當榮幸，「因為開咗直播，先記錄到好多警方嘅無理說話，例如唔畀我哋拍攝，呢樣嘢係好荒謬，因為採訪係記者天職，更何況你喺我報館。」

突發組大多採訪不同大案件，但陳形容昨天的警力，是他入行26年以來看過最誇張的一次，完全不合比例：「我覺得有成300警力，係對付重犯都唔會用到嘅警力，呢個好明顯係威嚇新聞界。」

他續指，黎智英或其他高層被捕時雙手反綁，部份更有膠袋套在雙手，「呢種情況只會用喺涉嫌開槍殺人、涉及掂過毒品，一啲謀殺案先會用」。

事發一刻，陳只顧為事實留紀錄，他指直播後都「有啲灰」，感到新聞自由相當脆弱。例如《蘋果》總編輯羅偉光不斷向警員要求出示搜查令，但警員完全沒有理會，「佢哋話已經出示咗，講啲嘢已經係隨便講，講大話」，加上在大樓外警員阻止港台等傳媒參與記者會，「反映警察心態已經係獎賞（准傳媒入內），你聽話就有得去，但呢個係荒謬，新聞自由係《基本法》賦予，唔係你施捨」。

至於人身安全，陳指同樣存有隱憂，「如果你話完全無驚，我諗就假嘅，因為你完全唔知《國安法》條臂有幾大，似乎係有佢講無你講」。在新聞自由充滿陰霾之日，同業應如何走下去？陳大嘆，自己早前曾掙扎是否要退下火線、離開《蘋果》休息一下，但昨日一役令他回心轉意，「但你見到管理層願意冒咁大風險，唔離開香港，都要支持新聞自由，無理由前線記者唔撐住。」

對《蘋果》的寄語？他輕輕說「撐落去囉」，動力來自於一眾讀者，「噚日做完直播、睇返讀者嘅留言，人人都支持我哋，白紙都照買，其實睇到好感動，咁點解我哋唔撐落去？」

Sammie在《蘋果》印刷部任職秘書23年，印刷報紙於她而言是每天日常，直至昨天，「我擔心出唔出到報紙，擔心到成晚瞓唔着。」

Sammie平日的工作，需來回同樣位於將軍澳工業邨的百樂門印刷公司及《蘋果》大樓。昨天當她仍身處百樂門時，在電視台看到新聞報道，有大批警員進入《蘋果》大樓。她馬上趕到大樓，「我諗住睇吓有無印刷部同事有咩要幫手」。

然而甫到達大樓，發現大樓所有出入口都被封，大樓外的兩條街道泊滿警車，她已不能踏足自己的公司半步。Sammie說，自己當時感到非常害怕，「你唔知佢會做咩，會唔會拉埋我」。於是她整天在看直播，看着警員翻查同事文件，又令同事「禁足」，不可自由走動：「任何一個小職員都會嬲，點解唔可以去廁所？點解唔畀食飯？」

《蘋果》近年面對的新聞自由危機，必定要數到2014年傘運期間的「十月圍蘋」，當時大批反《蘋果》人士持續圍堵《蘋果》大樓，勢阻報紙出街。Sammie憶述，當時即使凌晨時分亦跑回公司幫手，「我只係一個文職，其實幫唔到啲咩，但個心就係要返嚟，有咩幫到手就幫手，嗰陣我哋吊都要吊起啲報紙出街。」

直至昨天，她形容比「圍蘋」一役更憤怒，「我無諗過見到四五十架警車」。Sammie指，當時最擔心的是能否順利出報紙，一夜無眠，只為見證報紙順利誕生，但看到讀者說「就算白紙都買」感到非常感動，「我今朝直頭係喊咗」。

她形容《蘋果》對她來說是家，自己家人雖然持相反政見，但昨日一役從未令自己被嚇怕，將與《蘋果》共存亡，「敢講咁多（真話）嘅，都係得返我哋一間，如果無咗，香港真係唔知點」，鼓勵同事們「堅守崗位，唔好畀人打壓到我哋」。

在外工作的同事，並不比在報館內的同事好受。受疫情影響，原定在家工作的港聞版同事Bobby（化名），看見警員進入《蘋果》大樓的那張相片後，形容當下腦袋一片空白，「我覺得好震撼，太突然喇，反應唔嚟」。他指，作為前線採訪的一員，早就預計過這個畫面會出現，但沒有想過會是如此突如其來，「會以為係會有晒搜查令，入嚟前有晒預警，我哋就事前企晒喺門口。」

於是，Bobby一直於家中緊貼直播，看見警方大肆搜查自己熟悉的報館，甚至封鎖自己座位範圍，他有衝動馬上回公司幫忙，「但坦白講，返嚟都需要有好大嘅勇氣，知道有啲同事畀人查，又阻撓你返去咁」，最終他打消念頭，決定留守公司外，繼續做好採訪工作。

由實習到人生第一份工作，Bobby就是這樣一直在《蘋果》長大，「係一個令我畢業到而家都係一個避風港嘅地方」。於他而言，《蘋果》大樓是一個「可以有安全感地工作嘅地方」，「所以見到噚日咁，真係有屋企『中門大開』、畀外人闖入嚟嘅感覺」，這是一種痛心、欲哭無淚之感，「好似有嚿石砸落嚟嘅感覺」。

至於恐懼，Bobby認為的確心存隱憂，「唔止《國安法》，你見到有同事畀人電話騷擾、起底、擺上網，惟有自己小心啲」。不過，這種恐懼並沒有、亦不會吞噬他當記者的念頭，昨天一役亦無阻他繼續做記者，「做記者唔單只做記者，係做人，我做嘅嘢行得正企得正，呢個就係我，我覺得自己係要活得誠實。」

他笑言，做記者是一個「浪漫」的職業：「如果唔係工時長、生命又受威脅，邊個做都黐線㗎啦，但我好enjoy同一班黐線嘅人共事。」被問到想送給《蘋果》人的說話，Bobby選了魯迅1925年創作的散文詩《希望》中一句：「絕望之於虛妄，正與希望相同」：「我唔相信今日做嘅嘢，對未來係無意義。」

項目策劃部同事Michelle剛入職4個月，便迎來這新聞自由黑暗的一天。

她憶述，自己早上8時許就回到公司如常工作。大批警員突然進入《蘋果》大樓，除了管理層重鎮的2樓新聞部，3樓及4樓亦分別有警員駐守，期間有警員喝罵他們「全部人坐返埋自己位！」，並着他們擺放身份證在辦公桌上，「全部人係freeze晒，又唔畀我哋做嘢」。她指，在她旁邊的部門是客戶服務部，警員卻不准同事們聽電話。在其部門只有約3至4名員工，卻受多達7至8名警員監視。

「靜坐」數小時後，Michelle要求上廁所，其間有警員尾隨她到洗手間門外，她才發現幾乎公司每個角落都有警察，「由樓梯位去到轉角，都有警察企喺度，我以為我哋係犯」。警員亦不允許他們自由走動，即使要購買飲品都要有警員批准及跟隨。警員又曾着員工填寫問卷，要求員工填寫是否認識問卷上的公司和員工名字，她指當中有多名管理層的名字，包括黎智英。

警員隨後開始搜查不同部門文件，包括活動部、客戶服務部、人力資源部等。Michelle指，警員幾乎逐張紙都看一遍，「連啲event rundown（活動流程）都有睇」。除了文件，警員亦要求要搜查員工辦公桌的櫃桶，更一度指「叫EU（衝鋒隊）上嚟爆開佢」。

隨着搜查時間較長，Michelle可開始自由走動，但仍然不可到辦公室其他樓層。約下午1時，當時身處4樓的Michelle，發現3樓的同事被警員要求坐在中庭，並不可到餐廳午膳。她遂向樓下大喊「有無人要買嘢食」，有同事回應希望可幫忙購買外賣，但有警員喝罵Michelle：「喂！唔好嗌啦！做緊嘢呀！」。隨後她一直觀察3樓同事的狀況，警員直至下午5時後才將同事們放行。

Michelle指，警方以如此強大的警力硬闖報館，只是希望令《蘋果》員工不敢發聲，「你嚇小市民就話啫，你嚟嚇《蘋果》嘅人就真係錯咗囉，唔會嚇到囉」。不過，她指昨日一役，的確令部份嘉賓不敢踏足《蘋果》大樓，希望部份活動可另覓舉辦的地方，此後亦會更小心處理所有文件。

有資深舉辦活動經驗的Michelle，在數個月前才投身《蘋果》，原因是她深信《蘋果》的理念，「我係衝入嚟做，因為覺得呢件事正義，我哋係做緊啱嘅嘢，所以唔使嘥咁多人力物力嚇《蘋果》」。想對《蘋果》人說的話？她如雷貫耳地說：「大家等做到退休啦，我唔覺得（《蘋果》）咁快完囉！」

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新