曼聯名宿里奧費迪南星期二宣佈，會轉型做職業拳手，仲話以贏金腰帶做目標，不過英國拳撃理事會（BBBC）對於呢個好消息就好意外，因為里奧根本未申請拳手執照。

38歲嘅前英格蘭國腳里奧費迪南係喺星期一晚嘅電台節目中透露自己準備轉行打拳，但BBBC秘書長羅拔史密夫噚日接受《天空體育》訪問就話︰「好意外，冇人會喺冇同管理機構聯絡嘅情況下宣佈任何嘢。我冇收到申請，所以根本冇嘢要考慮。我都係喺電台（星期一晚）聽到呢個消息。」史密夫仲話︰「如果我哋收到申請係會考慮，一如我哋所需要做嘅，但我哋並冇收到費迪南先生嘅信件。」