【智取大市】中國永續金融體系(晉佳)
溫鋼城智取大市
晉佳指,離岸人民幣供應貨乾,有利中央貨源歸邊去頂住離岸價,這種操作是不歸路,亦不會改變。
中國、內銀嘅命運基本上聯成一線,與其對萬億賬要還呢句說話感到驚訝,倒不如睇吓成個中國其實有百幾萬億債。
對於中國債務,各界有好多非完全統計,反正都係天文數字,就以其中一種講法債務高達170萬億人仔為例,多過美國國債規模嘅21萬億美元,雖然比較項目不一,但只係想表達兩個國家都係超多債。
今次只針對講中國債務問題。唔理係地方債又好,乜債都好,越接近某種核心或大到不能倒嘅體系,債務話係幾多年期基本上都係多餘,反正有條件無限再融資無限續期,性質更似永續債。呢類債唔在乎你還唔還到本金,只在乎你每年還唔還到利息,你亦有可能係用緊你個本金去還息,只要一日還到息就唔會爆,話知你個本金已大抵蒸發,話明性質是永續,又點會追你還本金呢。
爆煲嘅,永遠係落馬人士或集團,之前安邦、而家肖建華包商銀行咪就係咁樣被接管。你可以想像到點解海航當初要博命做海外收購,當然亦想像到內銀資產質素情況如何,卻又可以頂到今時今日以至可見將來。
的確,每年中國要印夠銀紙、或靠收稅,總之令各個parties有錢每年還息,於是派餅周期是必須出現,當然,中國亦有傑出企業如騰訊、阿里等等去支持。離岸人民幣供應比較貨乾,有利中央貨源歸邊去頂住離岸價,呢種操作係不歸路,亦唔會改變。一帶一路就更厲害,令到咁多國家命運同人民幣聯成一線。
講到呢度,呢篇文其實一再執過字眼才出街,點解要咁做,你懂的。
晉佳
https://www.facebook.com/advanceguy1
-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX