「港女500」嘅人情論熱爆全城，就連政界都議論紛紛。八方就此打探過，一班月入逾8萬嘅立法會議員點畀人情，一句講晒：睇交情，做人情，雖然豐儉由人，但最低入場費係八嚿水，相信唔會俾「港女500」鬧爆。

公民黨大狀郭榮鏗話，家吓去親飲宴都會做1,500至2,000蚊人情，金額高低視乎幾熟絡。五年前結婚嘅佢，當時喺貴價會所Country Club擺酒；當時都有請社運人士去飲，最在意係人哋賞唔賞面出席，唔畀人情都唔介意。
政壇元秋有立法會炒樓天后美譽，出手當然闊綽，佢話唔會齋畀五嚿咁少，有時為咗好意頭，會開張3,388蚊嘅支票囉。除咗做人情，仲會送西班牙嘅雅致瓷器（Lladro）畀對方，果然夠豪氣，難怪成日獲邀去飲啦。但唔係個個好似元秋家底咁豐厚㗎。
代表基層打工仔嘅工黨李卓人就話，做人情同做人一樣，最緊要自由，自己一向唔出席就五嚿，出席就八嚿，好一視同仁。

酒店加一過$800

八方細心打探過，發現八嚿水係政界中人最低入場費，相信唔會有「港女500」嘅風波出現喺佢哋身上。至於最高呢？實在無上限，睇吓同對方幾friend啦。
熟悉飲食行情嘅張宇人以專家口脗提醒大家，街坊酒樓仲可以做到500蚊位，若然升呢至酒店，酒席連酒水加一都過800蚊，所以睇友情封人情之餘，都要睇埋去邊度飲㗎。

mailto:[email protected]