下周一（下月1日）元旦沙田跑馬上演11場草地賽，大眾偶像莫雷拉一場冇漏，卜滿晒座騎，以佢一向受歡迎程度，當然絕不意外。

另一位猛將騎十場的田泰安，座騎竟比二哥潘頓還多，睇牌面有望在新年伊始打響頭炮。

啱啱禮拜三（27日）田泰安策告仔馬房「綫路神駒」，與羅理雅胯下的文家良馬房「電子群英」鬥足一條直路，曾一度出頭之下，卻被後駒終點前反先，功敗垂成，結果全晚賽事食白果，今期肯定想贏馬補番條數。

其中，田泰安接手上次由莫雷拉執韁之「猴王駒」，可能首度策騎及未於晨課過檔，田泰安響今晨（28日）排位朝空檔時間，特地到烽火台找此駒練馬師文家良了解，以及齊齊傾吓今仗戰略，期間見阿田笑容滿面，似乎對於能接手「猴王駒」感到滿意，亳不在乎執二攤。