別離沒有對錯，要走也解釋不多，如果合拍上司被換咗，留低會唔會坎坷？

林鄭班子大地震，五個局換咗新掌舵人。而問責局長之下，仲有副局長同政治助理呢個鐵三角團隊，一旦直屬老細走人，有冇副局同政助跟住離任老細共同進退？

除咗冇副局政助嘅公務員事務局，八方問過換咗老闆嘅四個政策局，其中徐英偉出掌嘅民政局同薛永恒做局長嘅創科局，發言人噚日回覆，兩局嘅副局同政助都分別「返緊工」，換言之民政局副局長陳積志同政助黎穎瑜，以及創科局副局長鍾偉强同政助張曼莉，會留守原職同新老闆磨合。

財經事務及庫務局發言人就好直接，話明副局長陳浩濂同政治助理楊寶蓮均會留任，即係會同許正宇發展新關係。

據知上述大部份副局同政助，都係前局長喺政府推薦名單上物色，唔係親自挑選；但原政制局局長聶德權就據聞係親自揀人，搵嚟前AO陳帥夫放棄鐵飯碗做副局，前無綫主播吳璟儁加入熱廚房任政助，據知佢哋三位合拍度遠勝其他政策局。而家聶德權被調職，換上完全唔識政制嘅曾國衞，到底陳、吳會否留低？政制局發言人至今未回覆。

而據知徐英偉原有嘅勞福局副局長位置，則暫時懸空。神童局長羅致光咁叻，可能覺得唔需要幫手喎，但啲勞工政黨如工聯會，未必咁睇喎⋯⋯

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架
-----------------------------
App內1-Click訂閱《蘋果動新聞》
按此了解更多