荷李活影星湯告魯斯（TomCruise）上月喺美國路易斯安那州新奧爾良拍攝《烈探狙擊》（JackReacher）續集《JackReacher2：NeverGoBack》，雖然拍攝期間一度遇上火災，好彩有驚無險，事件中冇人受傷。53歲嘅靚佬湯，早前為《烈探狙擊2》去咗路易斯安那州一間學校取景，佢現身即被學生重重包圍，一向親民嘅靚佬湯當然任影唔嬲，逐一滿足在場學生同埋家長。

靚佬湯最近終於拍完新片，周五佢就驚喜出席美國超級房車賽（NASCAR）盃系列賽頒獎禮，佢同NASCAR盃系列賽冠軍謝夫哥頓（JeffGordon）齊齊擔任嘉賓。