中央真係話得班泛民冇錯㗎，成日勾結「外國勢力」。好似會計界立法會議員梁繼昌，呢幾日竟然請咗幫開英國國會議員嘅助理BenedictMaguire，喺佢議員辦公室觀摩。查實阿Ben呢程「世界巡迴」工作實習計劃，香港只係其中一站，留幾日就走，下站會去澳洲同美國。

本身係自由民主黨嘅阿Ben，佢老闆喺英國大選中落選，所以得閒向世界出發。作為英國人，阿Ben話英國有義務多啲關注香港嘅事務，如果因為同中國做生意，而唔理香港嘅人權民主自由，真係好羞家。佢話英國政黨為黨務同選舉，會公開籌款、向富豪揼心口，但八方同佢講，香港嘅選舉文化則係「蛇齋餅糭」，阿Ben聽完話呢個做法好有趣，即時反問：「這算不算賄選？」