最近Cookies餅碎楊愛瑾（Miki）重返舊公司StarzPeople，之前佢同金牌大風未滿約時嘅工作真係少之又少。不過自從Miki喺07年暗交永安集團太子爺郭永淳（Edwin）後，生活真係富貴，收入唔多嘅佢居然可以租住兩萬幾蚊嘅嘉亨灣，另外郭永淳年初已經同結婚9年嘅伍智恒離婚，之後喺余錦基幼子余仲行婚禮度，Edwin擔任兄弟，當日Miki就同佢前後腳到場。
噚日6點左右Miki就坐住Edwin嘅車喺勝利道出現，不施脂粉嘅Miki就坐喺司機位隔籬，Edwin就戴住帽負責揸車，後座仲有一個男性朋友。

拉低帽避鏡頭

當Miki發現有人影相時就即時戴番個太陽眼鏡，身旁嘅Edwin就立即將頂帽拉低，之後佢哋就直駛去廣播道一個屋苑，可能佢哋唔係住客，惟有駛番架車出嚟。後來佢哋見到記者，就即時走人直駛去港島區梅道Mayfair。現年33歲嘅郭永淳現時喺同父親郭志權共同持有嘅偉略企業集團擔任董事，而根據資料顯示Miki噚日所坐嗰架車登記公司亦係偉略企業集團有限公司。
事後Miki透過工作人員表示噚日一行十幾個朋友去遊船河，之後大家就坐唔同人嘅車離開，佢就坐Edwin架車走。Miki話Edwin車咗佢去Mayfair朋友屋企就離開啦，佢仲話大家係好朋友關係，唔係拍拖。不過根據資料Edwin07年同Miki夜蒲完後自己搭的士返Mayfair寓所，雖然唔知佢家仲係咪住嗰度，但係世事有無咁蹺呀！