田泰安堅過莫雷拉！呢位毛里裘斯裔騎師開季後日日有馬贏，包括今午（17日）第二場四班1000米直路賽，勝出霍利時馬房「旅英公爵」，單Win及組合獨贏A3分別派140.5及42.5元。

田泰安個人累積連贏五日未斷纜，暫有9Win排第二，「旅英公爵」馬主丘添在剛周三晚在谷草搏輸「旅英公爵」跑第三，如今成功補數，跑到季內第五次賽事，田泰安未斷纜之外，仲同霍利時保持合作未失三甲，兩人季內攜手五戰三冠一亞一季，威力可見一斑；霍利時亦告連續兩次沙田日賽贏馬。

講番「旅英公爵」，呢次係歷來首配田泰安出賽，排1檔沿途居中後位置，末段在跑道中央稍為偏近內欄的位置上前，無馬傍住獨自競跑亦衝得勁，兼氣走雷神座騎蘇偉賢馬房「友享友賞」，贏0.75馬位，是極少數在跑道中央過終點的直路賽頭馬，「旅英公爵」爆冷打破近兩季齋缽，人馬成功擦出火花，氣勢之盛絕對唔簡單。

第二場直路賽出馬十匹，大冧巴當道，10號「旅英公爵」勝出、6號「友享友賞」第二、8號「航天勇將」第三、7號「和平開心」第四，四重彩派六萬一千幾。